A chhe ber hmachhawn tura Sorkar a inbuatsaih a ngai

Tun hnaia Health minister hoa mi pawimawhte'n Covid-19 chungchang an sawihonaah Ministry of Health & Family Welfare-in kum­in December thlaah Mizorama Covid-19 vei zat chu mi 5,000 vel ni tura a chhût (projection) thu sawi chhuah a ni a, Health department-in Contingency Plan a siam leh a kaihhnawih thilte sawifiah a ni. 

Hun rei tak chhung Covid-19 hri kai awm mang loin Mizoram hi him takin a awm a, tun hnaiah erawh chuan kan dinhmun a ṭha ta bik lo hle. A ni telin positive hmuh thar an awm zel a, mi ṭhenkhat phei chu hri an kaina hriat lohte a ni ta nawk mai. 

Kan dinhmun thlir hian he hripui hi darh huk thei reng a ni tih a chiang ta a, tuna kan dinhmun chu eng pawh lo ni ta se, mithiamte chuan kumin kum tawpah Mizoramah Covid-19 positive hi mi 5000 vel zet awm thei angin an chhut.

Mithiamte thusawi ni lo innghahna tur leh behchhan tur dang a tam loh avangin Mizoram sorkar hi he hun hmachhawn tura tun aṭanga a inbuatsaih ṭan a ngai. Health department-in rim tak leh chak taka hna a thawh vanglai taka an pawisa che vel an han audit mauh maite kha thil danglam tak a ni. Kha audit kha an zo fel tawha an lo felfai ta viau nge, an sum hman dan a dik loh avangin an inhrem zui tih pawh mipui mimir (layman) chuan an la hre lo ang. 

Engpawhnise Health deptt tana sum tam zawk pek a remchang lo a nih pawhin Mizoram sorkar hian a sum khawl/ dahṭhat hi heng thil atana hman theih tur hian ruahmanna siam se, Finance minister berin budget chu 'duha kan theih, duha chhum theih' tih a lo sawi zauh tawh bawk a, SEDP-a sum dah la hman lohte pawh hi hman theihin siam se a ṭangkai thei viau ang.

December-ah hri vei mi 5,000 zet an awm thei tih mithiamte'n an sawi a, a chhe ber hmachhawn thei turin sorkar hi tun aṭanga a inbuatsaih a ngai ta e.