Hna phuailuai duh lo ram hruaitu

UD&PA enkawltu Deputy Chief Minister chuan, Ramhlun North Community Centre sak mêk a tlawh a; hna phuailuai a duh loh thu leh vantlang hmun tur chu a tlo thei tur ang bera sak a ngaih thu a sawi.

Mizoram hma­sawnna tiṭhuan­awptu lian tak pakhat chu hna a phuailuai ṭhin hi a ni a, hna a phuailuai chhan hi chu man ṭang ei an tam vang te leh hnathawktu lamin uchuak taka hlêp an duh vang a ni ṭhin. A finfiahna awm lo mah se tunlaia hna­thawh hrang hrang en hian a hotu lian lam aṭangin emaw, a hnathawktu lam aṭangin emaw, khawilaiah emaw hian hnathawhna tur sum hi a peng niin a lang a, a pawi hle a ni.

Deputy Chief Minister hian hna phuailuai a duh lo tih a sawi chhuak ngam a, a department chan mai bakah hna dangah pawh hna thawk phuailuai ṭhinte en zui ṭhin tawh se. A duh loh thil titute hi a takin umzui ngam se a ṭha ngawt ang.

Deputy Chief Minister ang hian Minister dangte leh Chief Minister-te pawhin hna phuailuai duh loin an hnuaia hnathawktute ṭheuh enkawlin vil uluk ṭhin se, hrem ngai hremin zilh ngai zilh se. A ṭul chuan bân hial pawh ngam thei ngat se Mizoramah hian hna phuailuai a tlem ang a, kan rama hna a ṭhat chuan sorkar sawiselna pawh a tlem phah ngei ang.