Mizoram theihna hman ṭangkai leh CM

Chief Minister chuan Mizoram chu theihna sang tak nei a nih thu sawiin, "Boruak nuam tak, la bawlhhlawh lo, ruah ṭha leh lui eng emaw zat kan nei a, Pathianin economic potential min pek hi kan hman ṭangkai a ngai," tiin Civil Service Day lawmnaah a sawi.

Kan ram hotupa ber hian kan rama theihna awm hi a hre chiang a, vawi tam tak a lo sawi tawh a ni. Tun ṭumah hian sorkar hnathawkte chu Mizoram tana hmathlir nei chunga thawk tura fuihin an hmathlir tihhlawhtlin a nih chuan India rama per capita income nei sang berah Mizoram chu an siam thei tih a sawi a; hmathlir leh phurna nen chuan economic molecule-a khat Mizoram tinung turin Uranium tlem te mamawh a nih thu leh chumi atana hmalatu tur chu sorkar hnathawk an nih thu a sawi.

Kan ram hotupa ber hian sorkar hnathawkte a fuihna ṭawngkamah economic molecule a hmang a, hei hi a kawh tum hriat ni lo mah se he ram hi thar hlawk thei a nihzia leh theihna a neih sanzia a sawina a nih hmel. Chu ram chu kum 15 dawn a enkawl ta a, tun thleng hian 'hmathlir' lam zel hi kan la sawi tui a, a tih tawh lam kawh tur kan la ngah lo a, ṭan lak kan la mamawh hle a ni.

Chief Minister sawi ang hian sorkar hnathawkte hian theihtawp an chhuah chuan Mizoram hi sang takah an vawrh thei tih hi a dik a; chutihlaiin a hnathawhna vawn fung chelhtu lam hian hmathlir ringawt lo tuna thawh tur an ngaihtuah a, an thawh ṭan a hun tawh takzet a ni.