Ruihhlo avangin kan rûm mek

Central YMA-in ruihhlo do tura September 9, 2022 aṭanga Central Anti Drug Squad (CADS) a din thar leh hnuah April 16, 2023 thleng khan cheng nuai 3,547.24 hû ruihhlo an man tawh a, chumi kaihhnawihah chuan mi 1,561 an man tawh.

Mizorama ruihhlo hluar dan hi ngaiah kan nei mai ang tih a hlauhawm ta a, nitin mai ruihhlo hi a hlawmin an man a ni ta deuh ber mai. Tun ang zela ruihhlo hi a zalen a nih chuan kan ram hmabak hi a thim takzet a, ruihhlo do kawnga kan kalphung pangngai hi chu kan thlak a ngai dawn niin a lang.

Mizorama ruihhlo lo lut tam tak hi Myanmar aṭanga lo lut niin ruihhlo hlauhawm chi hrang hrang a lut a, heroine no. 4 a hluar hle. He ruihhlo hlauhawm tak avang hian Mizo ṭhalai tam takin nunna an chân tawh a, chu mai ni loin ruihhlo avanga nih tur ni phak lo ṭhalai tam tak an awm. Chhungkaw chawmtu tur ṭhalaite ruihhlo lei leh ruih tur zawng reng rengin an buai a, chhungkaw tam tak an rûm a, kan ram dinhmun a ṭha lo hle.

Assam leh Tripura lam aṭangin zu chi hrang hrang a lo lut reng a, hei bakah hian phalna nei loin damdawi hman sual theih chi a hlawmin a lo lut ve reng bawk. Kan ram chhungah zu lei tur a awm reng a, khawpui daiah zu hmunpui tih tur a awm a, zu chhe tak tak man to takin an hralh chhuak reng a, kan ṭhalai tam tak chu zu vangin an thi mêk bawk a ni.

Heng kan din­hmun en hian tuna sorkarin ruihhlo a do dan hi chu a ṭha tawk lo tih pawm a hun a, tun aia chak zawka do tur a taka pen chhuah a ngai ta a ni. YMA lamin ruihhlo dotu pawl an din a, hun rei lo te chhunga heti zat an man a nih chuan anni puihna tel lo phei chuan zu leh ruihhlo do kawngah hian kan mualpho hle tih a lang reng.

Hetihlai hian indem ringawt hian awmzia a nei lo a, a sorkar lam pawh insiam ṭha se, zu leh ruihhlo avanga kan ram rûmna hi ngaihtuah chiang se, heti ringawta thlir liam chi a ni ta lo.