Thingtlang mite ram neih hlutna

India hmarchhaka Survey of Villages Abadi and Mapping with Improvised Technology in Village Areas (SVAMITVA) scheme hnuaiah tun hnai khan Phulpui leh Tachhip khuaah property card sem chhuah a ni. SVAMITVA hi sorkar laipuia Ministry of Panchayati Raj hnuaia mi niin Mizo­rama khua 319-ah kalpui tura ruahman a ni a; drone hmangin thingtlang khuaa mihring chen­na hmunte thlalak ni a, property card siamsak an ni a, dan angin ram neitu nihna pek an ni.

India sorkar hian ruahmanna ṭha tak tak a siam tawh ṭhin a, SVAMITVA pawh hi thil ṭha tak a nih a beiseiawm. Thingtlangah hian in hmun leh ramte hian hlutna a nei sang tawk lo ṭhin a, dan anga ziah luh a nih loh avangin a hlut tur angin a hlu zo lo ṭhin a ni.

Tunah erawh chuan sorkar laipui hmalakna angin Mizoram­ah pawh thingtlang khaw 300 chuangah an in hmunte chu dan anga ziah luh a ni dawn ta a, a neitute'n loan lakna atan pawh an hmang thei tawh dawn a, thil lawmawm tak a ni. He ruahmanna hi a taka kalpui kim a nih theih hunah chuan thingtlang mite pawhin an in hmunte chu an hlut lehzual ang a, loan lakna awlsam zawk a inhawng thei dawn bawk niin a lang a, thil lawmawm tak a ni.

Mi hausa zawkte'n thingtlanga in hmun an leisak nasa lutukte pawh hi veng tel thei se a duhawm a, a nei zawkin a nei lo zawkte in hmun an lei nasa ta lutuk te hi a veiawm. Engpawhnise tuna ruahmanna hi chu a bul ṭanna chauh a la ni a, a hlawhtlin chhoh zel chuan thingtlang in hmun hlutna a sang sawt dawn niin a lang a, ruahmanna ṭha tak a ni.