A lêt hnih/ thum chawm thei ram kan nei

Keiṭum leh Arṭahkawn inkar Tuichang luia lei hawngtu Chief Minister chuan Mizoram chu Pathianin mal a sawm ram, a chhunga cheng mipui lêt hnih/ thum chawm zo ram a nih thu a sawi a, Mizoramin lui kan ngah kan vanneihpui thu a sawi.

Kan ram ṭhatzia hre chiangtu Chief Minister kan nei a, ṭawngkam hrang hrangin Mizoram ṭhatzia leh ei a tlinzia hi a sawi tawh ṭhin. Kan boruak nuam tak chu hralh theiha mawi a nih thu te, theihna nei sang tak a nih avangin economic molecule nei ṭha a nih thu te, mau hmanga economy chawi san theih a nih thute a lo sawi tawh ṭhin a, kan ram theihnaah hian rinna a nghat a ni.

Mahni ram hre chianga a chunga rinna nghat ngam Chief Minister kan nei hi a lawmawm a, chutih rualin chu ram chu hmang ṭangkai thei bertu tur chu amah leh a thawhpuite hi an ni. Tun hnaiah kan ram ṭhatzia a sawi uar ang aiin chu ram ṭha tak chu an hman ṭangkaina hmuh tur a la tam tawk lo a, he mi kawngah hian an ṭan lehzual a ṭha ang.

He ram ṭha tak hian tuna mipui cheng sa lêt hnih/thum hi a la chawm thei tih kan Chief Minister-in a sawi a, a pawimawh hmasa chu tuna cheng sate chawm thei tur sorkar neih hi a ni awm e.