A tuartu humhim thiam zir a ngai

Tun hnaiah Lunglei-ah hmeichhe naupang kumtling lo khuaikhem a ni a, pawi khawihtua puh hi police-in manin Lunglei District Jail-ah dah luh nghal a ni. Thil thleng chungchangah hian MHIP Gen. Hqrs. leh Lunglei Farm Veng Branch MHIP chu thuchhuah siamin, pawi khawhihtua puh chu dan anga na taka hrem an phût. 

Lungleia thil thleng hian Mizoram mipui a barakhaih hle a, hmeichhe naupang kumtling lo chunga heti taka nunrawng hi mipuiin an dem hle. He thil thleng hi social media lamah nasa takin a darh a, thil thleng tak tak a ni tih nemnghet thei turin pawl zahawm tak takin thuchhuah siamin an dem zui bawk. 

Hetiang thil a thlen hian thinrim sosan lai taka thutlukna siam mai hi thil awl tak a ni a, mipui zinga tute'n emaw a demna lam hawi social media-a an tidarhte hi chu inkhap sen a ni lo a, an thinrimna thu an au chhuahpui tur hi dan vek sen pawh a ni lo ang. Chutihlaiin pawl hminga thuchhuah siam dawn hian a thu hi uluk zawka dah a ngai ṭhin a, mipui nawlpui inven sen lohnaah hian inven dan zir a ṭha hle. 

Hetiang vanduaina, a bikin pawngsual leh a kaihhnawih thilah hian a tuartute awmna veng tilang thei ang chite leh a tuartute miin an chhui zui theih tur anga thuchhuah hi a awm leh zauh ṭhin a, "Dan angin na taka hrem ni rawh se," tihte hi chu thil pangngai tak a nih rualin a pawi khawihtu kan hai lanna lamah hian a tuartute chhui theihna tur hi kan lo zep tel palh ṭhin. 

Tin, pawikhawihtu na taka hrem a nih theihna tur hian thuhretu (witness) an awm ṭhat a ngai ṭhin a, hetiang nikhua hian thuhretua ṭan kan hreh leh ṭhum si a, dan anga na taka hrem theih tur hi na vak loa hrem an lo ni tawh ṭhin. 

Engpawhnise dan hriatna kawngah hian a ram puma hmasawn kan la ngai a, pawi khawihna thlenga a tuartute humhim tur leh, an nihna thup­sak kawngah hian kan zavaiin kan inzir zel a ṭha ang.