Sorkar hnathawk hlawh lâk hun

Mizoram sorkar hnathawk pawl hrang hrang intêlkawmna, Federation of Mizoram Government Employees & Workers (FMGEW) chuan nimin khan Vanapa Hall-ah General Conference vawi 32-na an hmang a; Mizoram sorkar hnathawkte'n a hun taka hlawh an lâk theih nan hmalak an rél.

Kan state sorkar sum kalphung hi pawn lam aṭangin hriat theih ni vek lo mah se sum leh paiah harsatna kan tawk tih hi phat rual a ni lo. Sorkar hnathawkin hlawh an lâk hun a mumal loh avangin nasa takin nghawng a nei a, chhungkaw tam tak an rum mêk a ni ber mai.

Sorkar hnathawk ni ve lote thlengin hlawh lâk hunbi mumal lo hian a nghawng ṭhin a, sumdâwngin an tuar a, bank lama loan latuten an tuar bawk a, sum che vêl a buai hian nghawng a nei thui hle a ni.

Tunah chuan sorkar hna­thawk pawl meuhin a hun taka hlawh an lâk theihna turin hmalak an han tum ta chu a ni a, hei hi chu sorkar tán chuan mual­phona a ni a tih loh theih loh ang.

An hlawh bâk an phût pawh a ni lo a, an hlawh pun an phût pawh a ni lo a, an thawh hlawh a hun taka lâk an phût ta mai hi chu ngaihtuahin kan ram dinhmun a tilang chiang hle a ni.