Ram insumdawntawn leh Smuggling

Commerce & Industries Minister chuan tun hnai khan Zokhawthara ramria insumdawntawnna tura hna thawh mek a tlawh a, "Danin a phalte hmanga sumdawnna kalpui chu mipui zawm tur leh mawhphurhna a ni," a ti.

Tun hnaia Mizorama kan buaipui ber pakhat chu kuhva rah hmanga dan loa sumdawnna chungchang a ni a, he sumdawnna hian nghawng a nei lian hle tih chu tlang hriat a ni. Zalen taka smuggling kalpui a nih chhungin chhungkaw tam takin an dinchhuahpui mai ni loin an hausakpui a; nimahsela, hei hian Mizorama kuhva tharte hralh kawngah nghawng ṭha lo tak a lo nei reng si a ni.

Phalna neia lakluh ni se kuhva rah hrim hrim hi chu thil sual a ni lo a, ruihhlo leh ralthuam tawlhrukte nena sawi fin loh tur chi a nih hmel. Chutihlaiin kuthnathawktute tana harsatna thlentu a nih tak avang leh, hah taka kuhva thartuten a hralhna lamah buaina an neih si avang piah lamah; dan bawhchhiatna a nih miau avangin tihtawp ngei ngei a ṭul a ni.

Hetihlai hian kuhva rah tawlhruk hi man hleih theih loh lai kha a awm a, tun hnaiah hian an man thei ta em em mai a, a mak hle a ni. Engpawhnise, dan anga insumdawntawnna tur thil a awm a, dan lo a nih tawh hi chuan nghawng ṭha lo a nei ṭhin a ni.