Mipa thih chhan chhui chian a ngai

Directorate of Economics & Statistics chhinchhiah danin, kum 11 chhung, 2011 aṭanga 2021 chhung khan Mizoramah nau piang 2,61,707 an awm a, mi 70,545 thiin, hmeichhe thi aiin mipa thi 18,933-in an tam zawk.

Kan rama mihring piang an tlem avangin pawl hrang hrang leh kohhran an mangang ṭan tawh a, tun ang zela nau piang an tlem a nih chuan Mizote hi pung loin kan kuam mai ang tih hlauhthawnna a lian tawh hle.

Hetihlai mêk hian Mizo mipa thi an tam hle mai a, buaipui tham leh ngaimawh tham a tling ta. Mizo hmeichhia aia mipa an thih tam chhan hi mipa nun danin a zir loh vang tih zep rual a ni lo a, kan insiam ṭha a nih loha tun ang zela thi zat hi a inthlau a nih ngat chuan nakin lawkah chuan kan hmeichhiate hian pasal tur an indaih lo mai ang tih pawh a hlauhawm thei ta hial a ni.

Tun ang zela ruih­hlo a hluar a, zu khap burna dan hmang chunga zu chhia a tam reng tho chuan mipa thi zat hi a pung chho zel ang tih a hlauhthawnawm a, sorkar lam pawh a ṭan a ngai hle a ni.

Kan nupui pasal neih hun a tlai chho tawlh tawlh a, kan fa neih zat a tlem chho zel bawk a, a hun hmaa thi mipa an pun zel chuan Mizoram hmalam hun hi a êng lo a, kan dinhmun hi kan ngaihtuah chian a ṭul takzet a ni.