State hlim ber

MNF chuan Mizoram chu India rama state hlim ber (happiest state)-ah thlan a nih thu sawiin, "Sorkar ṭha, mipui sorkar kan neih vang a ni," tiin press mite hmaah an puang a; Gurugram khawpuia Management Development Institute hotu kaihhruaina hnuaia zirchiannaah Mizoram chu India ram state zinga hlim berah thlan a nih thu leh April 20, 2023 khan an puan chhuah thu MNF hotute hian an sawi.

Mizoram hi state hlim ber kan ni tih hi keini lamin hre lo mah ila a zir chiangtu lamin min puan miau avangin pawm loh hleih theih a ni lo a, tuna kan awm ang ang hian kan hlim emaw hlim lo emaw, zir chiangtute chuan state hlim berah min puang a ni.

State hlim ber kan nih dan an hrilhfiahna lamah ruling party lam aiawh chuan, "He sorkar, Pu Zoramthanga kaihhruaina hnuaiah hian Mizoram hi a chhe vek lo mai ni loin, India rama state awhawm ber pawl leh, hlim ber kan nihzia chu phai lam mi thiam, a zirchiangte ngeiin an rawn puang hi a lawmawm takzet a ni," a ti a, India rama state awhawm ber pawlah kan cheng tih hi mipuiin kan pawm thiam an duh niin a lang.

Kan hlim leh hlim loh te, kan lung a awi leh awi loh te, kan lawm leh lawm lohte hi pawn lamin min hmuhsak loh chin hi a awm thei pawh a ni mai thei a, Mizoram chhunga chengte hi kan lung a awi kim lo a, kan hlim kim lo deuh niin a lang. Kan dinhmun dik tak en hian state dang tana awhawm tak kan ni kher lo thei a, a zir chiangtu lam zir dan leh kan hmuh dan a lo inpersan deuh a nih pawhin mi thiamte'n 'state hlim ber' min tih chuan state hlim ber awma kan awm mai a ngai a ni.