Kumthar chibai

Kum 2020 kan lo chuang kai leh ta a, kumin atana Vanglaini chanchinbu chhuah hmasak ber ni a lo ni leh ta a, chhiartu zawng zawngte Kumthar Chibai kan buk a che u. 

Hun eng emaw chen Krismas leh Kumthar chawlh kan hman hnuah hna bul kan ṭan chho leh dawn ta a, thingtlang hmun tam zawkah Vanglaini thawn chhuah theih a la ni lo a, a phurtu lirtheite an la service mumal loh vang a ni. Khawpuia hmun ṭhenkhatah pawh chanchinbu semtu lam an la awm remchang lo ve ṭhin bawk. Hetih hun chhung bik atan hian Vanglaini hi a soft copy-in Pdf file-a sem chhuah a ni leh ang. 

Hemi ruala chhiartu lamin lo hre tel se kan duh chu Vanglaini chanchinbu hi mahni ṭhahnemngaihnaa lo scan a, Pdf file-a siama kum tluana lo thawn darh ṭhin an awm a, hei hi dan phal loh a ni a, phulisher phalna la hmasa loa soft copy siama thawn darh tawh lo turin kan inngen a. Kan duhsak zawngte'n chhiar ve se kan ti a nih chuan Vanglaini chanchin tharte hi www.vanglaini.org lamah man chawi ngai loa chhiar theihin a awm reng a ni. 

Kum a thar hian mihringin hmasawn a duh ṭhin a, kum a thar ruala thil ṭha zawk tih tur chhawp chhuak a, thil ṭha lo kalsan tum a nei 

ṭhin. Hetihlai hian a kuma thar tawh mah se a mihring erawh a ngai reng kan la ni a, hei vang tak hian kum thar hian rilru thar a her chhuahpui a ṭul a, chu thil thar ṭha zawk ti thei tur chuan rilru thar put thiam a pawimawh. 

Kumtharah hian mahni zawn ṭheuha hmasawn a, chak zawka ke pen thei turin Vanglaini chhiartu zawng zawngte duhsakna kan hlan a che u.