Assam Rifles leh Mizoram sorkar

August 18, 2020 khan Assam Rifles (AR) mi leh sate chuan Mizoram sorkar aṭanga phalna nei lo leh Mizoram sorkar official-te'n an lo dang chungin Mizoram an lut lui a; AR hotute chuan, Mizoram sorkarin phalna a pek duh loh avangin an naute chu an lut lui niin an sawi. Mizoram sorkara Home department chuan thil awm dan sawi chianna thuchhuah an siam bakah Assam Rifles Commander hnenah lehkha an thawn nghal bawk.

AR chet dan hi Mizo mipuite tham­loh­na lian tak a ni a, an theihna leh an ralthuam neihte hmachhuanin state sorkar dan pawh zah loin an paltlang lui a ni. Hei hian Mizo mipui rilru a tina em em a, Mizoram sorkar hian a en liam mai tur a ni lo ang. 

AR lamin insawifiahna an tihchhuah en hi chuan an thiam lohna hmuh tur a awm mang lo a, Ministry of Home Affairs aṭanga kal phalna an neih thu leh hna pawimawh thawk tura Mizorama lut tur an nih thute a chuang. Hei mai hi ni loin an thuchhuah ringawt en hi chuan Mizoram sorkar lam hi thiam loah an puh lêt lek lek a, national media thlengin Mizoram sorkar hi a hming chhe zawk angin an lang nghal ta hial a ni. 

Mizoram sorkarin rang taka hma la zuia a chhang lêt hi thil ṭha tak a ni a, an hotu hnena lehkha an thawnte pawh hi tih ngei tur a ni; nimahsela hei hi thil chinfelna leh tawpna angah an ngai palh ang tih a hlauhawm. A nihna takah chuan AR Brigadier (Commander) hnena Mizoram sorkar aiawhin lehkha an thawnna copy social media-a a darhte kha a zahawm lo a, social media-a Assam Rifles insawifiahna nia ngaih theih sawi fiah leh chhawnna hmanhmawh taka siamte pawh kha kalphung puitling ber a ni kher awm lo e.

CM emaw, Deputy CM emaw, Home minister emaw hian AR hotute hi koin thil awm dan sawipuiin dan palzuttute hi dan anga hrem a nih theihna turin hma la zui se; tun hnaiah AR hotu lian zinga mi pawh rangkachak tawlhruka inhnamhnawiha puh a nih chuan man hial a lo ni tawh. Tunah hripui lenlaiin kan police-te paltlang luiin state sorkar dan an rawn bawhchhia a, Mizoram sorkar tan FIR-te thehluha chhui zui ngei chi a nih hmel. Lehkha va thawn leh mipui hriata thudik puan chhuahna thuchhuah siam hi a tawpnaah hmang suh se.