DIET ngaihthah a ni em?

District Institute of Education and Training (DIET) hnuaia hnathawktute chuan an service-a harsatna an tawh avang leh, thla ruk chhung hlawh an lak theih tawh loh avangin tun hnai khan an hna an chawl a, Mizoram sorkar chu an hlawh tur state matching share pe turin an ngen a ni.

DIET kalphung hi ngun taka thlir chuan state sorkar tih ve tur lam hi a ṭhahnem tham hle mai a, hlawh tur pawh 40% zet a tum a ngai a, 60% erawh sorkar laipui tuma ni thung. State sorkarin an hlawh tur budget-ah a dah si lo a, sorkar laipui aṭanga sum lo kal hi hman zawh a nih rualin an buai ta mai ṭhin a ni ber mai.

Sum harsatna avanga thla hnih khat hlawh la thei lo leh khaihlak hi chu thil dangah pawh a awm zauh zauh tawh ṭhin a, thla ruk ngawt mai hlawh lak theih loh hi chu a tam lo a, hnathawktute an khawngaihthlak hle a ni. Ei leh in tur an mamawh a, an fate zirna tur atan sum an mamawh a, damloh leh harsatna dang pawh thleng se kum chanve zet hlawh lak loh chuan engkim mai a harsa lo thei lo.

Kan sorkar hian a duhna lamah chuan sum a nei a, state matching share tur pawh hi mi dangin an sawisel luai luai khawpa hmu thei bikte pawh an awm a, chutih laia zirna atana pawimawh em em mai DIET hnathawktute tana hlawh tur em pawh an tumsak thei lo hi a fel lo takzet a, an thawh hah man tal hi chu an hmu ngei tur a ni.