AR sawn chhuah politics tawp thei se

Assam Rifles hotute chuan Lammual hmun aṭanga Zokhawsanga an hmun thara an insawn hunah tuna an awmna hi chhuahsak vek an tum lo; insawn chhuak fel turin kum hnih leh a chanve vel an la mamawh dawn niin media hrang hrangah tarlan a ni.

Aizawl khawpui lailia Assam Rifles-in hmunhma an neihte hi an chhuahsan theihna turin Mizoram sorkarin theihtawp a chhuah a, an awmna tur hmunhma a pek felna pawh a rei tawh. Sorkar laipui ruahmannain an chenna tur in sak a ni a, state sorkarin kawngpui pawh a siam tawh a, êng (power supply) leh tui pawh pek an ni tawh.

March 23, 2023 khan lirthei lian chi 40 zet nena AR-te inthiar chhuahna tur lehkha, SP Traffic hnena an thehluh, Aizawl DC hnena a copy an pek chu a 'leak' a, an inthiar chhuak ta nge nge tia sawi pawl an awm a, 'inbumna' tia lo puh an awm bawk. Social media lamah inhnialna namen lo a chhuak a, tun thleng hi chuan an la insawn chhuak ta lo niin a lang.

Hei mai hi ni loin April 1 khan Union Home Minister meuhin an chenna tur hmunhma thar AR Battalion headquarters hi a rawn hawng tawh a, chuti chung chuan tun thlengin an la insawn lo. AR sawn chhuak theitu hi chu Mizoram sorkar ni loin Ministry of Home Affairs a ni tih a chiang tawlh tawlh a; kan thu chu ni se kan sawn chhuak tawh ngei ang.

Km 2019 khan lehkha nen meuh AR chhuah tur thu hi MHA-in an rawn hriattir tawh a, kan Chief Minister pawh ama thiam loh ni miah loah dawt an rawn puantir a ni ber a, Chapchar Kut-ah thu dik lo a au chhuahpui phah tawh a ni. AR chhuah chungchanga thuneitu tak tak chu state sorkar ni loin MHA an nih avangin MHA-in AR-te an sawn chhuah hun tura politics-a inhnialna hi chu tawp tawh se a ṭha hle mai.