Hna zawn thiam

Labour, Employment, Skill Development & Entrepreneurship (LESDE) department chuan May 9-10, 2023-a Mizoram Mega Job Fair an buatsaih dawn a, he hunah hian hna pe thei rintlak an lo kal tur thu leh ṭhalai hna zawngte tán hun ṭha a nih thu an sawi.

Mizoramah ṭhalai hna nei lo kan tih mai hi an tam hle a, a kuma telin an pung zel a ni ber mai. Heng zinga ṭhahnem tham tak phei hi chu lehkha zir sang tak takte an ni a, 'lehkhathiam hna nei lo' han tih mai tur ang hi an ni.

Hetih lai hian hnathawh tur lam hi chu a awm ve reng a, kan thawh duh zawng kan zawn ṭhin avang hian hna kan hmu lo pawh a nih hmel. Hna kan han tih mai hian sorkar hna kan kawhtir deuh ṭhin a, tunah hi chuan a sorkar hna lamin min daih tâk loh avangin hna nei lo an pung zel a, kan kal dan en mai hi chuan an pung zel lo ang tih pawh a sawi theih loh.

Sorkar hriatpuina leh a ruahmanna hnuaiah hna zawng mekte tan hun ṭha a inhawng dâwn a, ṭhalaiten hetiang hi ngaihven se, sorkar hna ni kher lo hna ṭha leh kan thawh thiam lam zawn thiam hi a pawimawh takzet a ni.