Sorkar leh AR thu bawk

August 18 tlaia Assam Rifles sipai ṭhenkhatin Vairengtea Mizoram sorkar dan zawm loa Mizoram an luh chungchangah Mizoram sorkar chuan AR hi lehkha a thawn a, mipui hriatah thuchhuah a siam bawk. Assam Rifles lam hian Mizoram sorkar hi ziakin an chhang tawh a, he mi hma hian thiam thu sawina thuchhuah an lo siam tawh bawk a ni. 

Tuna a lan dan hi chuan Mizoram sorkar leh Assam Rifles hi intiat reng ang mai an ni a, a taka indawrna awm si loin lehkha an inthawn tawn a, chu mai chu duhtawk loin mipuiah thiam chang zawk nih inchuhin an lehkha inthawn tawnte pawh chu mipui hmuh theihin an tidarh zel a ang ta ber mai.

State sorkar ve riang ruang siin Assam Rifles sipai tlem te a cho tawk lek anga lang hi a chhunga cheng mipuite tan pawh a thang tlawmthlak a, kan rama sipai tlem te awm vete nena inchhang inchhang tur pawh hi kan ni chiah lo mai thei. Chutihlaiin AR-te hi sorkar laipui mi leh sa an ni a, Ministry of Home Affairs hnuaia mi an nih avangin lamṭang nei ṭha intiin harsatna an siam lui ve zel thei bawk. 

Engpawhnise hetianga inhmuh thiam lohna a thlen tawh hi chuan lehkha inthawn tawn ringawt hi buaina chinfelna a ni lo tih a chiang tawh a, Mizoram sorkarin AR hnena lehkha an thawn pawh anni lamin ṭawngkam insum karna nei vak loin rang takin an rawn chhang let tawh a ni. Hei hi Mizoram sorkar hian a aia nain va chhang leh eng ang pawh ni se, AR lam hi chuan an duh ber an ti thei tawh tho a, kan state dan siamte pal zutin 'dan loin' an rawn lut lui tawh tho a ni. 

Mizoram mipuite thinlung hliam tidam tur chuan kan state sorkar hian kan dan siam zawm duh lotu AR sipaite lakah engtin emaw taka action an lak theih a ngai dawn a, chumi ti tur chuan a ṭul a nih chuan kan Chief Minister pawhin AR hotute hi ko mai se, kan state dan siam zawm duh lotute'n heti taka lehkha min thawn khum bawk hi chu mipui tan a na hle a ni.