A hun taka hna zawh

DoNER Secretary chuan sawrkar laipuiin DoNER Fund a tihpun tur thu sawiin, Mizoram pawhin a sum hmuh ṭhin lêt thum a hmu thei tawh dawn a ni a ti a; chutihlaiin hriatthiamnaa 'advance' pek ṭhin erawh tihtawp a nih tawh thu leh, bill siam fel a utilization certificate(UC) thehluh a nih hnuah chauh sum hi pekchhuah a nih tawh dawn avangin DoNER aṭanga sum hmu ṭha tur chuan state tinte ṭanlak thar a ngaih thu tun hnaia Mizoram a tlawh ṭumin a sawi.

Mizoram sorkar hnuaiah hian hna lian tham tak takte pawh thawh a ni tawh a, harsatna lian tak chu a huna hna zawh loh a awm ṭhin hi a ni. Kan hna neihte hi a len poh leh an thawk muang emaw tih mai tur a ni a, dan ang thlapa hna pek ni si a hnathawktu lamin a huna an zo thei lo ṭhin hi thil fel lo lian tak a awm tihna a ni thei.

Mizoram Larsap pawhin tun hnaiah Mizorama project hrang hrang tihkhawmuan (delay) a tam thu leh a huna zawh lohin nghawng a neih ṭhin thu a lo sawi tawh a; a huna hna zawh loha revised estimate hmanga sum tam zawk dil chhuah hi kan kalpui rei ta a, hei hi hmasawnnain a tuar hle a ni.

Tun hnaiah DoNER chuan a kalphung thlakin hnathawh bul ṭanna tur sum an pe chhuak tawh dawn lo a. UC thehluha fel taka bill siam a nih hnuah chauh sum a pe chhuak tawh dawn a nih chuan Mizorama kan hnathawh dan pawh a siam ṭhat theih i beisei ang.