Mizorama politician tualthihna

May 9, 2023-a Chakma Autonomous District Council (CADC) inthlan awm tura Rengkashya biala BJP candidate Amit Kumar Chakma, MADC chief executive member hlui ni bawk chu May 4 zan dar 11 vel khan thah a ni.

Mizoram chhungah ngei politician pakhat chu politics thuila a campaign laiin thah a ni a, he thil thleng hi a pawi takzet a ni. Tualthihna hi thil dangah pawh thleng tawh ṭhin mah se tun hnuah hi chuan politics thila tualthihna hi a thleng khat tawh hle a, CADC inthlan lo awm tura thil thleng hi a demawm hle a ni.

He thil thlenna hi Mizoram chhung a nih miau avangin ngaihthah ngawt chi a ni lo a, kuminah mai hian inthlanna lian zawk MLA inthlan a awm dawn a, venhimna ṭha zawk leh fel zawk ammawhna a sang hle a ni. Roreltu thlanna a nih miau avangin ṭan a na tlang a, mipui pawhin tharum hial an thawh duh chang a awm a, hei hi politician senior zawkin an khap hram hram ṭhin tur a ni ang.

Tuna tualthihna hi politics vanga thleng ngei nia a lang hi a pawi zual a, hetianga kut inthlak duhtute hi tu party mi pawh ni se ram leh hnam pawi khawihtu an tling a, Mizoram chhungah politics avanga tharum thawhna hi thleng tawh suh se.