Manipur buaina leh Mizoram

Manipur-ah Meitei leh tribal inkarah buaina a chhuak a, mi tam takin nunna an chân tawh a, Kristian te biak in tihchhiat a nih bakah tribal in halsak a ni a, state hrang hrangin Imphal leh a chhehvela an mi leh sate an la chhuak mek.

Manipur buaina hi a nihna takah chuan Meitei leh tribal inkarah buai­na lam aiin Meitei lamin Zohnah­thlakte an beihna a ang ber a. A hre zawkte sawi dan phei chuan he buaina hi tun hnaia alh chhuak ni mah se inbuatsaih lawk thlap a nih hmel a, Meitei hian a hnam anga chet an lâk piah lamah a state sorkar aṭanga puihna dawng anga puh theih turin thil tam tak hi a kal tawh a ni ber mai.

Zohnahthlak tam tak an thi tawh a, an tihsual vang ni miah loin Zohnahthlak an nih vang hrim hrima beih tawk an ni a, a huatthlala takzet a ni. Hetihlai hian Mizoram lama a him china lo inhrosak chiam chiam te, buaina ṭhelh lam aia a tipunlun thei zawnga lo chet te hi tih loh tur a ni a, he lama Meitei awmte kut lo thlak lam phei chu tih loh tawp tur a ni.

Mizote thiar chhuak tura State sorkar hmalakna in lungrual takin thlawp tlâng ila, raltlan awmte chungah ṭhat chhuah zel ila, he buaina a fel theihna turin ṭawngṭaina nen i ṭang tlâng ang u.