Vote thlak tura mipui sawmna

Mizoram Peoples' Forum (MPF) hruaitute chuan tun hnai khan thuthar thehdarhtute an kâwm a, August 27, 2020-a village council (VC) leh local council (LC) inthlan tura an thuchahte an puang a; MPF president chuan, "Inthlanna thianghlim, zalen leh muanawm a awm ngei theihna turin mi tinin theih­tawp chhuah ṭheuh ni se. Inthlanah hian khua leh tui dik tak, vote neite chuan thlak ṭheuh tur a ni," a ti. 

Mizorama inthlanna awm ṭhinte hi a ralmuang tlangpui a, zalen taka inthlanna a ni deuh zel. Tlemlai deuh khan Mizoramah hel pawl an awm avangin hmun ṭhen­khatah silai nena invaunate lo thleng bawk mah se, a ram pum thlir hi chuan inthlanna dik, felfai leh ralmuang tak a ni deuh zel. 

Tun ṭuma village council leh local council inthlang tur erawh a dan a dang deuh dawn a, Mizorama political party zawng zawng deuhthawin Covid-19 hri leng avanga inthlan hun sawn tura an ngen laiin ruling political party MNF lam chuan State Election Commission lamah inthlan hun sawn turin ngenna an siam ve lo a, August 27-a inthlanna kal tlangpui hi an thlawp niin a lang. 

He inthlan hi hripui lenlai a nih miau avangin inthlanna zalen leh muanawm tak kan neih ṭhin dangte nen a inang dawn lo a, sorkar thuchhuah ṭhenkhatah kum 65 chung lamte chu inkhung hram tura ngen an nih bakah natna benvawn neite pawh pawn chhuak lo tura thurawn pek an ni a, chutih kara inthlannaa vote thlak tura kal chhuah chu zalen taka kal chhuah a harsa dawn a, zalen taka kan inthlan tawhte nen chuan a inang thei lo ang. 

Hetihlai karah hian khua leh tui ṭha, vote nei chinte chuan vote thlak hi an mawhphurhna a ni a, tunlai boruaka mahni ina tawm tura kan inchah mawlh mawlh laia in aṭanga in ko chhuaka vote thlak vek tura in sawm pawh hi a sawmtu tan chuan a inthlahrunawm thei hial ang. Mipuiin eng angin nge inthlan hi kan ngaih pawimawh a, hri lengin eng ang chiahin nge kan 'democratic duty' ti thei loa min siam, tih chu vote tla zat aṭangin a teh theih dawn a ni.