Inpui nghaktu

Tun hnaiah Mizoram chhehvel ram leh state hrang hranga Zofate chenna ramah tualchhung buaina a chhuak a, hei vang hian Myanmar, Bangladesh leh Manipur aṭangin Mizoramah raltlan tam tham tak an rawn lut mêk a ni.

Myanmar leh Bangladesh-te hi chu ram dang an ni a, an ram chhunga buaina avangin Zohnahthlak nauten Mizoramah sahimna an rawn zawng a ni. Manipur buaina hi chu India ram state danga thleng a ni a, India sorkar leh Manipur sorkar hian Indian ve tho Zohnahthlakte heti taka tawrhtir an phal hi a mak a, a demawm takzet a ni.

Hei vang tak hian Mizoram chhunga cheng mêkte hian rilru zau tak kan put a pawimawh a, ṭha tak leh duat taka kan unaute kan dawnsawn thiam a ṭha. Ram danga mite tana dan leh hraiin a phal loh chinte a awm thei ang a, chutihlaiin dan bawhchhiatna ni lo chinah chuan unau kan nih hre chunga kan indawnsawn a ṭha hle ang.

Mizorama awmte hian inpui nghaktu kan nih hi kan chian a ngai a, sahimna zawnga rawn lutte chungah ṭhat i chhuah zui zel ang u.