MNF Vice President thusawi
Lungleia Mizo Hnam Run hawnna inkhawmah thusawitu MNF vice president chuan, "Politics boruak pakhat CAA, 2019 hi MNF chuan kan duh lo a, kan do a, kan do zel ang. Kohhran zawng zawng, NGO leh party zawng zawngin kan duh lo a, kan Chief Minister leh MP Pu C Lalrosanga pawhin Prime Minister, Home Minister-ah nasa takin an bei a ni," a ti a; an duh loh leh an ngen angin Mizoram chu CAA huamtir a ni ve lo tih sawiin, "Kan lawm hle. Heti khawpa min duhsak a, min telh tâk loh avangin kan party duh dan angin MP pawh kan vote-tir a ni. Engmah thil hre chiang lo, ram tana ni khat pawh pen chhuak ve lo, powder inhnawih paw chawpa lo rak ve vak vakte hi engah mah lo ngai suh u," a ti.
Mizoram kaihruai mektu, ruling party-a Vice president thusawi hian ngaihtuah a tithui a, CAA do zel a la inti chunga CAA-in min huam loh avanga chu MP chu lawmthu sawinaa CAA ṭan zawnga an vote tur thu a sawi mauh mai. CAA hi Hmar Chhak mai ni lo, a ram pumin a duh lo a ni ber a, BJP tih loh chuan an duh loh thu an sawi deuh vek a, dodalna pawh a nasa hle. Hetihlaia CAA lam hawia vote thlak hi Mizo mipui nawlpuiin an pawm lo a ni tih chu tun hnaia thil thlengah a hmuh theih. Chuti chunga CAA thila duhsakna dawng bik leh chumi avanga lawmthu sawinaa kan duh loh ber CAA lama vote thlak leh si hi sawi mam thiam a harsa khawp mai.
Tun hnaia Mizorama CAB/ CAA duhlohna lantirtu langsar chu ṭhalai leh zirlai lam an ni chho mek a, hetihlaia MNF vice president-in, "Ram tana ni khat pawh pen chhuak ve lo, powder inhnawih paw chawpa lo rak ve vak vak te," a tih hi amah leh a awmna party hian sawi fiah se a ṭha khawp mai. Kan ṭhalaite hi zirlai an ni a, ram tana pen chhuahna remchang an neih chu sakhaw tihbik/ tih loh bik neihna CAA do hi a ni a, chumi tura an pen chhuak hi tu khap theih mah an ni lo a, ring party hotu lian hian tute nge 'rak ve vak vak' a tih hi a sawi chian a ngai a ni.
CAA duhlohna leh dodalna hi ram pumah vung takin a kal mek a, BJP lamin politics-a an vawk Lal len lai a nih vangin Parliament-ah hneh takin a tlang a, a vote-tu zingah MNF aiawh MP ngei pawh a tel. He CAA duhlohna kal meka au chhuakte dem zawng lek lek a, "CAA kan do zel dawn," ti reng chunga MNF vice president thusawi hi amah emaw, a party-in emaw an sawi fiah zui a nih loh chuan CAA duh lotu Mizo ṭhalai rualte rilru hi a dam mai lo ang tih a hlauhawm khawp mai.