Assam Rifles leh sorkar thu

Assam Rifles mi ṭhenkhatten sorkar thu pawisa loa Vairengte gate tihluihnaa an paltlang chungchangah tun hnai khan Chief Minister, Chief Secretary leh Central YMA hruaitute an inhmu khawm a, AR-te chet dan hi Home Ministry hnenah a rang thei ang bera thlen an rel. Hetihlai hian CYMA chuan AR-te chu an thiltihah ngaihdam dil turin an phût bawk a ni. 

AR sipaite chet dan hian Mizo mipuite thin a tiur em em a, Mizoram sorkar leh a chhunga chengte an tham lo hle niin a lang. He mi chungchangah hian kan sorkar hi na taka che zui ve nghal tur pawhin mipuiin an phût a, an chet zui tum dan la hriat loh mah se na takin lehkha an han ziak phawt dawn a nih hmel a, hei baka an kal zel dan tur chu vantlang hriatah puanzar a ni lo.

AR hian state sorkar dan dinglai an palzut niin a lang a, he thil hi sorkarin ṭha taka a bawhzui tur thil a nih angin Home department lamin lehkha an ziak nghal vat a, mipuiah thudik puan chhuahna thu an chhuah nghal thuai bawk. Home department lam hi rang takin che zui mah se he mi chhang let hian AR lam pawh an rawn che ve thuai a, mipuiah thuchhuah an neih bakah Mizoram sorkar thu hi na takin an chhang ve leh bawk. 

Sorkar hian he buaina chingfel tur hian thuneitu sang zawka lehkha ziah leh a tum hi thil ṭha tak a nih hmel a, chumi ti tho si chuan CM hian emaw AR Commander emaw hi ko se hmai chhanah thil sawipui se a ṭhat hmel. Tuna a kal danah hi chuan Home Ministry-ah kan zuk hêk dawn a ni ber a, AR lamin insawi­fiahna an nei ve leh thei a, helai bawrah hian kan kualvel mai mai palh ang tih a hlauhawm.

Chief Minister-in buaina chinfel dan rel tura Deputy Chief Minister leh Home Minister em pawh ko tel loa CYMA lam a ko teh daih pawh hi thil danglam tak a ni a; CYMA chu NGO an nih anga ṭul an tih dana an tih tur an ti ve mai tur a nih laia sorkar nena AR laka hmalak zui dan tur rel tur ang deuha an inhmukhawm hi chu thil danglam tak a ni. Tunah chuan CYMA hi AR lakah engtin pawh che zui se CM hoa rel angin a kal palh mai ang tih a hlauhawm a, hei hi CM leh YMA tan pawh nakin zelah thil ṭha ber a ni lo thei.