Khawtlang enkawltu

August 27 hian Mizoram hmun hrang hrangah Villace Council (VC) inthlan­ nei turin State Election Commission chuan ruahmanna a siam a, he mi ni vek hian Aizawl khawpuiah Local Council (LC) thlan a ni bawk ang. 

Hripui lêng kar­ah, a hun sawn tura nasa taka nawrna karah inthlan hi kal tlangpui a ni dâwn ta niin a lang a, inthlan hi neih a nih rau rau chuan mipui pawhin ṭha taka vote thlak hi kan mawhphurhna a ni tih i hre thar ang u. Hripui lêng avangin mi ṭhenkhatin vote an thlak hreh deuh a nih pawhin dem lo ila, vote thlaktu zingah tel hram i tum ang u. 

Kan thlan chhuah turte hi kum nga chhunga kan khúa leh veng enkawltu turte an ni a, hei hi political party inbeihnaa ngaia kalpui loh hram a ṭha hle. Mipui hian kan khawtlang enkawltu tur kan thlang dâwn tih hria ila, hmun danga sorkarna siamtu tur thlan ang a ni lo a, political party ang zawnga thlir loh hram a ṭha awm e. 

Kan khúa leh venga VC leh LC atana candidate awmte ngun takin zir hlawm ila; mahni khúa leh veng enkawltu tura kan duh political party ni loin, kan khúa leh veng enkawla kaihruaitu tura kan duh mihring thlan chhuah thiam ni se a hlawkna teltu chu a khúa leh vengte an ni dawn si a.