Fimkhur takin inthlang ang u

State Election Commission (SEC) hotute chuan vawiina Village Council leh Local Council inthlan tur atan an inpeih thu an sawi a; hetih lai hian, Covid-19 hri leng avanga containment area-a DC-te'n an puanna khua leh vengah chuan inthlan buatsaih a ni dawn rih lo. 

Hun rei tak chhung inthlanna kalpui tur leh ṭhulh tura duhna karah inhnialna a awm tawh a, tunah chuan inthlan kal tlangpui tur a ni ta a, vote thlak ni a lo thleng ta. Vote thlak hi khua leh tui ṭhain a tih tur pawimawh tak a nih angin vote thlak hi kan zavaia mawhphurhna a ni. 

Covid-19 hri leng avangin ṭum danga inthlan nen chuan a inang dawn lo a, hetia thlir mai chuan vote tla zat pawh hi a hniam hret mai awm mang e, a tih theih. Hetihlai hian vote a tlak ṭhat theihna turin vote nei chin mimal tin hi kan pawimawh dan a inang vek a, vote thlak ngei turin rilru pawh siam ila a ṭha ang. 

Sorkar thuneitu lamin mipuiin him taka vote an thlak theihna turin ruahmanna an siam ngeiin a rinawm a, hei hi an insawi dan pawh a ni. Kan hri leng mek a darh zel lohna tura ruahmanna an siamte hi mipuiin zawm ṭha ila, fimkhur takin khua leh tui ṭhain a tih tur angte hi zawm ṭheuh i tum ang u. 

Vote tlate hi chhiar zui nghal a ni dawn a, tling an awm hun­ah pawh mipuite fimkhur chhunzawm zel ila, lawm avanga inchibai leh pun­khawm tuau tuau awm lo se, danin awm khawm leh pun khawm a khap avangin inthlanna kan neih tawhte nen a inang lo tih hre rengin, fimkhur takin he inthlanna hi i hmachhawn tlang ang u.