Manipur-a thlawh chhoh tum CM

Manipur buainaa Mizoram mi tangkhangte thiarchhuah hna Mizoram sorkarin a thawh chungchangah chief minister Zoramthanga pawh Manipura thlawh chhoh tumin a inbuatsaih hman hial niin MNF Media Department chuan an sawi a, "Venhimna lama a remchan loh avang leh Manipur lamin an lo welcome loh avangin a thlawk chho ta lo a ni," an ti. Mizoramin pá chan zo taka changtu Chief Minister a neih avanga an lawmthu an sawi.

Manipur-a Zo­hnahthlakte harsatna tawh hi a ziaawm mai dawnin a lang lo a, thisen in chhuah tawn tawh an nih avang leh hnam thila a kal avangin buaina a punlun zel.

He buaina avang hian chhungkaw tam takin in leh lo an chân a, a bikin Imphal leh a chhehvela cheng tribal-te an tán kir leh ngam pawh a ni tawh kher lo ang. Hei vang hian thuneitu lamin theihtawp chhuaha remna palai hna an thawh a hun a, tun anga inkap tawn reng leh ram inchhuhsak tuma inkahna a kal zel chuan a nghawng a ṭha lo thei hle ang.

Chief Minister hi buai ṭan tirh khan Manipur lama thlawh chhoh a tum niin MNF Media Department lam chuan an puang a, a tum tak tak leh tak tak loh lama inhnial loin a lo tum a nih chuan a fakawm hle a ni. Buaina sosan lai leh a sarhu lai taka thlawh chhoh a tum ngam kha a fakawm a, thlawk chho leh ta chiah lo mah se a tumna pawh Zofaten an thla­muanpui ngei ang.

Hetihlai hian Manipur-a buaina chingfel tura thlawh chhoh hunlai tak a nih hmel tawh a, kan CM hi remna zawngin kal thei se a ṭha hle ang. Manipur buaina bul tia an puh an Chief Minister hi BJP niin MNF nena NDA leh NEDA-a thawk dun reng an ni tho a, an thawhpui CM hi han be ngei se. Zofate laka a nunrawnna avanga buaina chhuak chungchangah huaisen takin sawipui thei se a duhawm hle.