National highway-a zangnadawmna

MJA, Kolasib district chuan, National Highway no. 306(A) Vairengte-Aizawl inkar kawngpui zauhna tura ram lak leh zangnadawmna pek chungchangah thil dik lo a awm ngei nia an ngaih thu an tarlang.

MJA, Kolasib district hian khawtlang hruaitute an zawh fiah hnu leh RTI Act hmanga zawhna an zawh chhanna aṭanga a lan danin he kawngpui sialna tura zangnadawmna pek dan turah hian thil fel lo tam tak a awm a, an hriat chian chinah ringawt pawh hian a dik lo chu a lang chhuak tawh a ni.

Kawngpui siamna tur zangnadawmna pek danah hian titi a tam hle a, Assembly House-ah pawh sawi chhuah a lo ni tawh ṭhin. Tun ṭuma kawngpui sialna turah hian V/C pass ni ṭhin periodic patta-a dah luh danah te, a taka ram neitu ni miah loin kawngpui kalna tur nia an rin hriat avanga ram an lei dan te, tute emaw kawngpui kalna tur lo hre thei bikin huaisen taka ram an lei dan te, khawpui lama mihausa tak takte'n nuai tam taka ram ruak an lei dan titi awmte hi a tak ni lo se a ṭhat tehlul nen, tuna a lan danah hi chuan thil hi a fel vek lo ngei tih a rin theih.

Sorkar laipui project lian deuhah hian a hre hmasa leh thiltitheite'n ram an lei khawl a, zangnadawmna tam tak tak an lak tawhna hi a awm a, hmun ṭhenkhatah phei chuan official-te nen inthuruala thiltithei deuhte'n kawngin a paltlang ngei tura ram lo lei lawk a awm ṭhin.

Tun hnaiah pawh titiah chuan zangna­dawmna dawng tura hming lang si lo, mi thiltithei zingah pawi­sa tam tak tak la tur an awm nual a, politician-te leh sorkar official-te hming thlengin titiah chuan an sawi chhuak tawh.

Engpawhnise ram ruaka pass insiam chawp te, a hre lo zawkte buma an ram leisaka zangnadawmna tam zawk dawn te, sorkara thiltihtheihna hmanga ram neitu ni miah loin zangnadawmna an lakte hi awm lo se a ṭhat tehlul nen, National Highway no. 306(A) Vairengte-Aizawl inkar kawngpui zauh turah hian titi a tam hle a ni.