Sorkar sum pûk

Mizoram sorkar chuan Open Market Borrowing (OMB) hmangin loan cheng vbc. 125 a pûk leh dâwn. OMB hmanga sum pûk hi kum khatah a pung vawi hnih rulh tur a ni a, kum 10-15 velah sum pûk zawng zawng rulh a ngai a; a punna chu 7-8% vel a ni.

Sorkar kum hmasa 2022-2023 chhung khan Mizo­ram sorkar hian OMB hmang hian cheng vbc. 1,315 a pûk niin a lang a, heng sumte hi Mizoram sorkarin a rulh leh vek tur a ni. Sorkarin sum a indaih miau loh chuan pûk tur a zawn a ngai a, pûk lo thei lo dinhmuna kan awm avangin sorkar tán tihngaihna dang a awm lo niin a lang.

Hetihlai hian he sorkar tho hian sorkar sum awm sâ chu SEDP tiin mipuiah a semin a sem chhuak mêk a, mipui tana din chhuahna tham tak tak pawh ni loin Rs 25,000 vêl te tein a sem chhuak mêk. Sorkar sum indaih lo em em, a huna sorkar hnathawk hlawh pawh pe thei lo, rulh leh tura a pung säng tak awm sum puk chunga a lehlama sem chhuah si hi thil inhmeh lo tak a ni.

SEDP atan hian a hranpain a ziakin sum dah ni mah se a takin a sum hi a awm lo a, sem a nih dâwn chuan pûk mai a ngai ang. Kan sorkar hian a hman chawp tur sum pawh a nei lo a ni mai thei, a hnathawktute ngei ngei pawh a hunah hlawh an pe thei lo ṭhin a, a pawi hle a ni.

Engpawhnise sorkar hian pawisa a pûk zel hian sorkar lo awm leh zel tur leh ṭhang tharte tan phurrit an hnutchhiah zel a ni tih hre tlâng ila, hetiang lo deuha kan sum bawm kan enkawl theih hun a nghahhlelhawm hle a ni.