Sum pek chhuah tur nei lo Treasury
Mizoram sorkar sum dinhmun a ṭha lo a, Treasury chuan tun hnaiah bill a pe chhuak thei lo. Thil hmanhmawhthlak bik bakah medical kaihhnawih leh April, 2023 thlaa hlawh la fel lo sorkar hnathawk hlawhte an pe chhuak a, a bak chu bill an pe chhuak lo a, hnathawktute chuan 'technically closed' tih ṭawngkam an hmang a ni.
Sum bawmah sum a awm loh chuan pek chhuah tur a awm thei lo a, Mizoram sorkarin Open Marker Borrowing aṭangin sum puk a dil mek a, cheng vaibelchhe 125 a puk dawn. Hei hi tuna pawisa lo hman puk nasat ni loin a pung nena rulh tur a ni a, a sum nei lo ber hian a pung nena rulh tur sum hi kan puk zing ta malh malh a, kum 2022-23 chhung khan OMB hmanga a puk ringawt pawh cheng vaibelchhe 1,315 a tling a, puk theihna dangah pawh a puk hnem hle a ni.
Sorkar hnathawkin a huna hlawh an lak theih loh lai leh, kan sum bawm pawh 'a ruak chu a ni ber e' tia sorkar offcial lamin a ruk deuh taka an sawi tawh chinah chuan kan sum dinhmun hi a ṭha lo hle tih a chiang a; hetihlaia sorkarin inthlan dawna din chhuahna tham ni si loa SEDP hmanga pawisa a sem chiam mai hi a inhmeh lo ngawt mai.
Tunah hian kan ram sum bawmah sum a awm lo a, bill a pe chhuak hleithei lo a, hnathawktu lamin hlawh an la mumal thei lo a, contractor leh supplier-te bill tam tham tak tak hrên a ni bawk; sorkar sum enkawl dan hi ngaihtuah ngun a ngai ta hle a ni.