Kan zirna buaipui dan hi

Mizoram Youth Commission Chairman chuan, "Mizorama zirna hrim hrim hi a bulthum aṭanga din thar a, tuai thar a ṭul," a ti a, zirtirtute pawh khawvel zirna sang leh zau zawk thlir pha tura an hriatna tizau tura a duh thu a sawi.

MYC Chairman thusawi hi thil dik deuh mai a ni a, ngaihtuah zui tham leh a ṭul anga bawhzui ngei chi a ni. Kan zirnain min thlen theih chin chu tuna kan dinhmun hi a nih hmel a, zirna kawnga intihsiakna hrang hranga state ṭhenawmte pawh tluk mang lohna line kan ngah ta em em mai hi a zirlaite kan dem rualin kan zirna kalpui danah hian siam ṭhat ngai a awm a ni ngei ang.

Zirna hi a bulṭhut aṭanga a fuh tawh chuan rah ṭha tak a chhuah ṭhin a, a ṭobul a fuh loh laklawh chuan a lera ṭhuai ringawt chuan awmzei a nei tam lo a ang hle. Tun hnaia UPSC exam-a Mizoram zirlaite an tling hleithei lo pawh hi kan zirna bulṭhut aṭanga fuh tawk lo a awm pawh a ni mai thei a, a tling thei lo exam hmachhawn tute kan dem rual hian kan zirna kalpui danah hian siam ṭhat ngai pawh a awm hmel hle a ni.

Zirna in siam ṭhatna atana loan kan pûk dan leh chu pawisa kan hman duh dan en hi chuan kan zirna hi kan dah pawimawh tawk lo a ang hle a, zirlaite puala an in neih ve satu tur kan thlan dan, zirna in thuam ṭhatna tura sum awm kan hman duh dante en hian, zirna kawnga kan sang lo hi thil mak tak pawh a ni lo.