Ram leh hnam tana nunna hlan thu

Remna Ni (June 30) puala thisen pek runpui hawnnaa thusawitu Chief Minister chuan Mizoram remna ang hi ram dangin neih an chak thu a sawi a, Mizote chu mahni ram leh hnam chhanna atana nunna hlan ngam an nih thu leh chu chu hnam dangin Mizote an ngaihsan chhan a nih thu a sawi.

Miin a nunna meuh a hlan ngam tawh chuan a theihna sang ber a hlan tihna a ni a, Mizoram tana nunna hlantute an fakawm a, an zahawmin an chhuanawm takzet a ni. Ram leh Hnam tana inpekna hi khawvelin a ngaisang a, chumi hnua remna lo thleng pawh mi dangin an awt a nih pawhin thil mak a ni lo.

Hetih lai hian thil pawimawh tak awm chu chu ram kan enkawl zui dan hi a ni a, kan ram neih chhun hi Mizote hian duat leh hmangaih taka kan enkawl zui lo a nih chuan; kan remna awt ngawih ngawihtu nia kan ngaihte ai hian kan hnufual palh ang tih a hlauhawm ta takzet a ni. Tun hma ang kha a ni tawh lo a, engkim hi a lang tlangin awlsam takin a hmuh zung zung theih tawh a, state dangte hmasawnna leh ṭhan dan pawh kan hmu thei. State hnufual deuh zawk anga kan en ṭhinte pawh kan tluk lohna a tam ta hle a, he ram hian hmangaih taka enkawltu a mamawh takzet a ni.

Mizoram enkawlna tura sum lo kal; mahni hlawkna tura pawh pen ching te, mahni hlawkna tur a tel loh chuan project ṭha tak pawh bawhzui duh lo te, mahni hlawk theih dan tur ngaihtuah rana sorkar laipui ruahmanna her rem ching te, zángnadawmnaa ei neih ve dan ngaihtuah reng reng te, sorkar sum che vela dan loa chan neih ve tum tlatte leh; mipui pawisa pawh pen tum ràn ram hruaitu leh official-te awm lo se; ram leh hnam tana nunna hlantu an awm laia ram tana hnawksak zawnga che leh ram hmasawnna tur sum lo eiru duh an awm ṭhin hi a pawi takzet a ni.