PHE hmasawnna leh hmabak
PHE Minister hoin tun hnai khan an department hotute chuan thuthar thehdarhtute an kawm a, India ram pum huapa an lawmman dawnte leh an hmalaknate an sawifiah a; Jal Jeevan Mission (JJM) hnuaiah lawmman pali an dawn thu an sawi a, "Mizorama thlangtlangah in 1,33,060 a awm a, JJM ṭan a nih hnuah in 1,05,627-ah tui connection pek a ni tawh. A hma-a scheme dang hmanga tui connection lo pek tawh in 9,021 nen in 1,14,826 (86%) pek a ni tawh. Hmarchhak state-ah dinhmun sang ber kan luah mek. Mizoramah thingtlang khúa (khawper telin) 728 a awm mek a, khaw 316-ah in tinin tui connection an nei vek tawh," an ti.
PHE-in an hnathawh an puangzar hi thil lawmawm tak a ni a, an hmasawnna pawh a fakawm hle a ni. Mizorama khaw zatve vêl zetah mipuiin hnianghnar takin tui in tur kan nei tawh a, mahni inah ngei tui connection kan nei thei ta hi hmasawnna lawmawm tak a ni.
Hetih lai hian kan khawpui ber Aizawlah chuan tui indaih lohna a nasa hle mai a, hei hi department lama thawktute thiam loh pawh a ni vek lo a, tui lâkna lam a kâm mêk a, harsatna hian zual lam a pan zel dâwn niin a lang. Chutiangin Lunglei khawpui pawh an tui lâkna ber chu ṭhalah chuan a kang chat ta lek lek bawk a, khawpui dangte pawh an dinhmun a ṭha vak lo tih kan hai awm lo e.
Hei vang hian Mizoram sorkar hun ruahmanna thar a neih a ṭha hle mai a, tuna kan kal dan pangngaia kan kal a nih chuan ṭun aṭanga hla vak loah hian kan khawpui ṭhenkhat hian a kham khawp tui lâk tur a nei lo thuai dâwn niin a lang. Kan tui lakna lui a kâm chak hle a, a chhehvelah thing leh mau kan tichereu nasain tuihnar kan tichhe zo a, kan awm dan pangngai hi kan thlak hlawk a nih loh chuan tui lâk tur hi kan vàn deuh deuh dawn a ni.
PHE department lam hian tun aṭangin kan hmalam hun lo thleng tur thlir chungin ruahmanna siam thei se, sorkar laipui aṭanga project awmsâ ṭha taka an kalpui piah lamah hian kan ram mila inbuatsaih lawk a ṭul ta takzet mai. Tui dahkhawmna tur siam kawngah te, tuihna tihpun kawngah te, tui lâkna tur thar ngaihtuah kawngah emaw, mipuiin an kham khawp tui an neih theihna turin beng sika an ngaihtuah a ngai hle a ni.