Manipur raltlante dinhmun

Central YMA chuan an office chunga CYMA Hall chu Manipur aṭanga raltlante lo chawlh lailawkna (transit camp) atan an buatsaih a, chhungte belh tur nei lote tan leh raltlante lo chawlh lailawkna atan buatsaihin ei leh in tur a pe a ni. CYMA chuan raltlante dawnsawn kawngah chak zawka hma la turin Mizoram sorkar an ngen.

Manipur buaina hi a la reh mai dawnin a lang lo a, thil awm dan thlir hian Manipur Zofa zinga tam tak hi chu an in leh loah hian an kír mai dawn lo a, kìrna tur nei tawh lo pawh tam tham tak an ni ang. Hei vang hian Manipur aṭanga raltlante lo dawnsawn dan leh kalpui zel dan tur hi ngun taka ngaihtuah a ngai réng a ni.

Tun hnaiah Myanmar leh Bangladesh Zofa eng emaw zat chu an rama thil thleng avangin Mizoramah an rawn raltlan a, anni hi sorkar danah foreigner an nih miau avangin India sorkar chuan refugee angin a pawm duh lo a, Mizoram sorkarin a sum neih ang angin a chhawmdáwl a, a lawmawm hle a ni. Hemi hnu hian sorkar hotute sawi dan chuan kan Chief Minister-in sorkar laipui hotute a hmin a, raltlan chhawmdawlna tur sum eng emaw zat an rawn pe ta a ni.

Manipur aṭanga raltlante hi chu foreigner pawh an ni lo a, tualchhung buaina avangin Mizoram an rawn pan a, sorkar tan pawh ṭha taka lo tuamhlawm turin tu mitmei mah ven a ngai lo. Kan unaute lo chhawmdawl leh an awm zel dan tur buaipui hi thawhlawm khawn chawpa thawk chhuak YMA tan tlin reng loh hun a awm palh thei a, Mizoram sorkar hian ruahmanna fel zawk nen, sum leh pai leh hnathawktu tur ruahman felin CYMA rawt ang hun tun aia chak zawkin sorkar hi a chet a ṭul takzet a ni.