CM-in a duhsak zawngte a vur em ni?

Congress Legislature Party (CLP) Leader Zodintluanga chuan press statement tichhuakin, Chief Minister-in a duhsak zawngte a vùr nasat avangin Mizoram sum dinhmun a chhia niin a tarlang.

CLP Leader chuan sum leh pai enkawltu ber Chief Minister-in sum harsat chhanah Covid-19 a chhuanlam laiin Lengpui Airport atan te, a tuipui em em hlawhtlinna hmun tur awm si lo rua leh mau atan te, Kamrul-a leh Zoramchhana tante leh a fachuam Robert Romawia Royte state matching share tur sum a awm reng nia sawiin, "Mizo mipui nawlpui tana sum a harsat lai leh sorkar hnathawkte pawhin hlawh an lak mumal theih loh laiin tute emaw, leh khawiah emaw atana sum a tam si hi thil dik lo tak a ni a, kan ramin a tuar mêk a ni," a ti.

Politics-ah hi chuan thu inchuh hi a awm reng ṭhin a, Chief Minister hian a duhsak zawng hi a vur bîk tak tak nge inpuh chhiatna mai mai zawk, tih hi hriat chian a ṭha khawp mai. Thil lang chiang tak chu Zodintluanga puhna ang hian sum hmanna ṭhenkhat hi chu a hmuh theih a ni.

Kan ram sum dinhmun chhiatzia kan hria a, sorkar hnathawkten a huna hlawh an lâk chu 'news' a tling ta hial a, hetiang tak hian Mizoramah sorkar hnathawk hlawh lâk hun mumal lo hi a awm kher lo ang. Mizorama kohhran ṭhenkhat chuan an thlà tin thawhlawm chhiar hun pawh an sawn phah hial a, chutih laia thil ṭangkai leh hmanhmawhthlak ber pawh ni loa Finance Minister-in sum a pe chhuak thei a nih chuan; thil a fel tawk lo a ang hle.

Tu pawh Chief Minister niin Finance Minister ni se, Mizoram sum enkawl hi thil harsa tak a ni ang tih a chiang a, pawisa awma sem chhuah danah pawh inlungrual a harsa ngei ang; chutih laia kan sorkar sum hman dan en hi chuan, CLP Leader-in sum harsat chhana Chief Minister a puh pawh hi thil mak tak chu a ni lo e.