Sorkarin zirna a ngaihthah em ni?

Aam Aadmi Party (AAP), Mizoram chuan tun hnai khan thuthar thehdarhtute an kawm a, sorkar sikula zirlai 20.25%-in zirlaibu an la dawng lo niin an sawi a, July hi first term exam hun a nih tawh avangin zirlai tam takin harsatna an tawh thu an sawi.

Mizoramah hian zirna a tlahniam ti pawl leh zirnain hma a sawn ti pawl hi an awm ve reng a, political party-a kan àwn lam azir hian kan zirna hi kan thlir ni maiin a lang a, a zia lo hle a ni. Kan sorkar hruaitu lam chuan sorkar sikulin hma a sawn thu te, zirlai inziak lut an pun thute an sawi uar a, chutih lai chuan zirlaibu sem chhuah ringawt pawh a hunah kan tifel thei lo a, a pawi takzet a ni.

Sorkar sum harsatna avangin Mizoramah thil tam tak a hunah a thleng thei lo a, hna tam tak an muan phah a, hnathawk zote pawhin an hnathawhna bill an hmu thei mai lo a, sum harsatna hian nghawng a nei lian hle. A nghawng nat ber pakhat chu sorkar hnathawkte niin a hunah hlawh an la thei tawh meuh lo a, a huna hlawh an lak chhunah mi ṭhenkhatin chhuang takin social media-ah an thehdarh tawh hial a ni.

Harsatna hrang hrang a awm thei a, chumi piah lamah eng anga sum harsa pawh ni se, zirlaite zirlaibu tihchhuah hi chu a hun takah peih ni se, tlai avanga zirlaite zirna kawnga nghawng ṭha lo tak nei thei a nih lai a; June thlaah pawh zirlaibu pe chhuak kim thei loa sorkar a muang lutuk hi chu thil pawi tak, zirna ngaihthahzia entirna a ni thei hial awm e.