Him lo chunga inthlanna?

State Election Commission (SEC) chuan August 27 khan Mizoramah Village Council leh Local Council inthlanna a buatsaih a, hetihlai hian khua leh veng 32-ah Covid-19 hri leng avangin inthlanna kalpui theih a ni lo. 

Covid-19 hripui leng avangin Village Council leh Local Council hun tawp tawh pawh sei a ni a, a hun takah inthlan theih a ni lo. August 5 khan SEC chuan thuchhuah siamin inthlan tur thu hi a puang a, Covid-19 hri len lai a nih miau avangin engkim mai hmanhmawh taka kalpui a ngai a, inthlan puan rual deuhthaw hian nomination pawh thehluh nghal a ngai hial a ni. 

Political party hrang hrangin Covid-19 hri leng avanga inthlan hi a la hun loa an ngaih thu sawi ni mah se SEC chuan inthlan kal tlangpui a rem ti ta a ni. Nimahsela inthlan a hnai a, Covid-19 hri leng avang bawkin khua leh veng ṭhenkhatah inthlan ngam a ni ta lo a, thuneitu lamin a khawtlang hruaitute be rawnin khua leh veng ṭhenkhatah inthlan an ṭhulh. Hmun ṭhenkhatah chuan an dinhmun enin inthlan ṭhulh hi thil âwm tak a ni a, hmun ṭhenkhata an ṭhulh chhan erawh chuan mipui a tihrilhhai hle thung. 

India ram state dangte bakah hmar chhakah ngei pawh Assam lamin Bodoland Autonomous Council inthlan an sawn hla a, Arunachal Pradesh pawhin Panchayat inthlan an sawn hla bawk; Mizoramah chuan inthlan kal tlang­pui a nihlaiin inthlan ngam lohna a awm ta nual mai. Heng khua leh vengahte hian inthlanna dang result hriat hnuah an inthlang leh dawn a ni a, inthlan kalphungah chuan duhthu a sam lo hle ang. 

Tun ṭuma inthlanna hi Covid-19 hri leng leh a kaihhnawih thil dang avang hian inthlanna a ṭha lo zawnga hriatreng hlawh a nih mai a hlauhawm ta hle a ni.