Chhim lam airport

Lunglei aṭanga khawthlang lama Vuakmualah thlawhtheihna ṭumhmun (airport) siam theih a nih dawn leh dâwn loh chu tun hnai khan helicopter hmangin thuneitute'n an enfiah a; sorkar thuchhuah tarlan danin aerial survey titute hi Agriculture Minister, Rajya Sabha MP leh Lunglei HPC Vice Chairman-te an ni.

Mizoramah thlawhtheihna ṭumhmun pakhat kan nei a, a ṭangkaizia hre chiangtu ṭheuh kan ni. Chhim lama airport siam tumna awm hi thil lawmawm tak a ni, airport thar kan neih belh thei a nih ngai chuan a bikin Mizoram chhim lama chengte tán a ṭangkai dâwn takzet a ni.

Inkalpawhna lam chi reng reng hi chuan hmasawnna a keng tel a, kawngpui ṭha, rel kawng, lawng leh thlawhtheihna ṭumhmun pawh ni se; lawm taka lo dawnsawn vek tur chi a ni. Chhim lamah hian airport hi nei thei ngat ila chu, tuna kan suangtuah thiam phak bâk hian a ṭangkaina kan hmuh belh zel ngei ang.

Hetih lai hian tun hnaia thlawhtheihna ṭumhmun siam tumna; Vuakmual enfiah dan erawh rin ngam a harsa a, inthlan dawn hnaih tawhah technical lama mi thiam ni bîk lem lo politician rualin helicopter aṭangin an enfiah tih a ni a, an thiamna lam chu eng pawh lo ni se, an enfiah hun leh a entute lam ngaihtuah chian hi chuan airport hi kan la nei mai lo a nih pawhin a mak lem lo ang.