Task Force-te inenkawlna senso

Melriat Village Task Force  (VTF) Chairman leh YMA President ni bawk chuan Covid-19 a vei tih hmuh chhuah a ni a, State Referral Hospital (ZMC)-a dah luh an nih hnuah, task force member, hripui veite damdawi-ina an awmna bill chawi a ngai chu ṭha lo a tih thu a tichhuak a; hemi hnu hian Mizoram sorkar chuan Covid-19 dona a thawktu, hripui veite enkawlna senso chu sorkarin a tumsak vek dawn thu a tichhuak ve nghal. Notification pawh chhuah thuai a nih tur thu an tarlang.  

Mizoramah Covid-19 hripui a darh zau zel a, posi­tive zingah he hri dona atana hlawh phût loa inpe Task Force member-te pawh an awm ta. Positive zinga mi khawtlang hruaituin task force member-te inenkawlna senso mahnia intum tura an tih thu a au chhuahpui hnuah sorkar chuan hmanhmawh takin thuchhuah a siam rum rum a, Task Force member-te zingah Covid-19 positive an awm a nih chuan a inenkawlna senso sorkarin a tum­sak tur thu an tichhuak zui ta a ni. 

He sorkar thuchhuah hi beh­chhan notification pawh la nei lo a ni a, Task Force member inenkawlna senso an tumsak tur thu hi a hmain ziaka dah a lo la awm lo hrim hrim a nih hmel a, a zialo hle a ni. 

Covid-19 do hi a hautak a, sorkar tán mahnia do ngawt theih a ni lo a, mipuite tha chakna a mamawh piah lamah a dona senso tur pawisa pawh a khawn hial a ni. Mipui lam pawhin phal takin pawisa an thawh a, mi hausate chauh ni loin mi hausa ni lem lote pawhin an remchan ang ang hripui dona atan hian an theh chhuak a ni. Heng pawisa thawhtute hian hri dona kawnga inpete inenkawlna senso hi peksak vek an duh ngei ang a, sorkar lamin peksak a tum thu a puang hi chawpchilh deuh mah se thil lawmawm tak a ni. 

Hripui do tura inpe Task Force member-te hnathawh man hi a pawisaa pek tur ni se a ṭhahnem tham hle ang a, sorkar tán pawh an thawh 'man' hi rulh sen a ni hauh lo ang. Hei vang hian Covid-19 dona kawnga hnathawktute'n hripui hi an lo kai palh a nih chuan, an inenkawlna senso hi a zavaiin sorkar hian a tumsak ngei tur a ni.