Aizawlah Bru House

Mamit bialtu MLA chuan Mizoram sorkarin hnam tlem zawkte a ngaih pawimawh ṭhu leh Aizawlah Lai, Mara leh Chakma house-te a awm tawh a, Bru House din tumin sorkar hotute'n hma an lak mek thu a sawi.

Aizawlah hian Autonomous District Council neitu Lai, Mara leh Chakma-te'n anmahni pualin in an nei ṭheuh a, tun hnaiah Bru puala in siamsak tumna a awm tih MLA-in a sawi chhuak ta. Bru-te hi a hranpaa Autonomous District Council nei an ni lem lo a, chuti chunga an puala in an nei a nih chuan hnam leh chu hnam peng ṭhenkhatte hian an puala in neih tumin an nawr ang tih hlauhawm tak a ni.

Hetih lai hian hnam tlem zawkte himna tur ngaihtuah te, an hamṭhatna tur ngaihtuahte hi sorkar tih tur a ni a, Bru-in an puala in hran an nei tur pawh hi a lawmawm hle.

Chutih laiin Bru House sak tum hun erawh ngaihtuah a tithui deuh a, he sorkar hian Bru hi a ngai pawimawha a ngaihsak tak tak a nih chuan tun hma deuh pawha lo ngaihtuah theih ni se a ṭhat vei nen, an thil tih ṭum ṭha tak hi MLA inthlan boruaka sawi chhuah a nih chauh avang hian inthlan dawna vote zawnna anga puh palh a awl khawp ang.