Mizoram lui zir chian

Larsap chuan tun hnai khan Power & Electricity (PE) department leh Ministry of Jal Shakti hnuaia Central Water Commission (CWC) hotute a kâwm a, a rang lama Mizoram lui aṭanga kawlphetha siam chhuah theih zat dik tak zir chian dan tur a sawipui. Larsap hian he mi chungchang hi Prime Minister a sawipui tawh a, "Prime Minister chuan Mizoram PE department-in Prime Minister Office-ah presen-tation an pek a remti a, Mizoram sorkarin PMO-a presentation kan pek hmain kawlphetha kan siam chhuah theih zat chiang zawka zir chian a ngai a ni," a ti.

Larsap-in Mizo-ram lui tui hmanga kawlphetha siam chhuah theih dan Prime Minister a lo sawipui tawh hi thil lawmawm tak a ni a, "Statistics inang khat leh rintlak a rang lama neih a nih theih nan information in neih angte inpe tawnin, thawkho ang che u," tia PE Department leh CWC-te a hrilh hi a pawimawh hle a ni.

Mizoramah hian sorkar department hrang hrang hian data inang lo an nei fur a, hei hi siam ṭhat theih ni se a ṭha ngawt mai. Kan nihna aia inziah tama thil dawn theih tur a awma inziak tam mai, a changa inziak tlem leh mai ṭhinte pawh an awm a, sorkar department hrang hrang hian data inang lo an nei thluah a, statistics rintlak loh hian hmasawnna hna thawh a tibuai thei.

Larsap rawt ang hian statistics rintlak neih hmasak a pawimawh a, chumi piah lamah chuan thawhhona ṭha a pawimawh tel bawk. Chutiang nena kan lui neihte awmze neia zir chian a nih chuan kawlphetha pe chhuak tura a theihna leh chakna kan hre chiang ang a, kan lui tui chakna hmanga kawlphetha siam chhuah kawngah a pui ngei ang.