Sorkar sum sênna

Thenzawl Golf Resort project chu tun hnai khan Mizoram Journalist Association-in an tlawh a, he golf course enkawlna atan hian thla khata an lakluh aia tam hman ṭhin a ni a, tun thleng hian ram pawn aṭangin golf khel tura kal mi pakhat a awm.

He Thenzawl Golf Resort project hi Union Minister of State for Culture & Tourism Prahlad Singh Patel chuan kum 2020 khan a hawng a, a project hi Swadesh Darshan Scheme hnuaia siam niin a siamna man hi sorkar laipui tum vek a ni. He project lian taka sum senso a tam tehlul nen, thla khata lut zat hi cheng nuai 2-5 vel a nih si chuan project hlawhtling tak anga chhal ngam a ni lo ang a, an zir chiang tawk lo pawh a ni thei.

He project lian tham tak hi Mizoram sorkar sum aṭanga siam a nih loh avang hian sawisel a kai vak lo niin a lang a, mahni suma din loh na na na chu sum a thawk chhuak vak lo a nih pawhin kan thlir liam thei mai a nih hmel. Chutihlaiin eng project pawh hi kan state-a din a nih tawh chuan project lian dang an dah leh dawn hian a awm tawh hi an thlir ve bawk ṭhin a, hman ṭangkai loh thil lian tham a awm hian a dang dah lehna tur atan hnawksak a ni ve palh thei.

Thenzawl Golf Resort dinna senso hi kan state sum aṭanga tum a ni lo chungin an sen ral zat leh a sum lakluh theih zat tur hi ngun taka ngaihtuah chuan, ṭul loa sum sen thlawnna a chang thei a, chutih rualin Mizoram tan chuan kan neih phak loh project lian tham kan neih theihna remchang angin a thlir theih bawk ang a; engpawhnise, kan ram chhungah infrastracture lian tham tak din a ni ta sa sa, a ṭangkai thei anga hman dan zawn zel a ṭha hle mai.