Zo hnahthlak thlavang hauhna

Manipur tualchhung buainaa Zo hnahthlakte tawrhna avanga thlavang hauhna chu June 23, 2023 hian Aizawlah buatsaih a ni dawn a, NGO Co-ordination Committee chuan hei hi a rel a, Mizo zawng zawng tel turin an sawm a ni.

Tun hnaiah Zo hnahthlakte'n harsatna an tawk nasa hle mai a, Mizoramah rawn raltlanin an sahimna an rawn zawng ṭhin. Myanmar aṭanga raltlante hi Zofa an nih avanga hnawhchhuah ni loin an ram politics buaina avanga sahimna zawng an ni a, chutiangin Bangladesh aṭanga raltlante pawh Zofa an nih avanga raltlan bik an ni lo. Manipur lama kan unaute erawh Zofa an nih avanga buaina tawk an ni a, an lainatawm hle a ni.

Tun hnaia Manipur-a buaina chhuak hi hun rei tak chhung inmûng tawh, uluk taka duan niin a lang ber a, Zo hnahthlakte chunga hleilenna a ni. Manipur-a tlang mi tribal ve tho; Naga-te zuah an nih laia Zofa an nih avanga um chhuah leh thah an ni hi a huatthlala takzet a, khawvel ram danga kan hmuh ṭhin chi leh chi inthliarna avanga insuatna thleng ang chiah hi kan ṭhenawmah mai hian a thleng a ni.

He thil thleng hi Manipur Chief Minister hian a tum tak tak a nih chuan a titawp thei ngeiin a rinawm a, buaina chinfel theihna tur leh Zo hnahthlak thlavang hauhna atan kan Chief Minister hian dawr nawn leh thei se a ṭha ngawt mai.