Khawtlang tana hnathawh

Mizorama Village Council leh Local Council inthlan chu a nawlpuiin zawh a lo ni ta a, Covid-19 hri lêng avanga inthlan theih lohna hmun awm bawk mah se harsatna lian tham thleng hriat a ni lo. 

Inthlan dawnah khúa leh veng tinah vote hmu hnem ber nih duhin candidate-te an inzuar a, a hun a bichilh avangin campaign-na hun ṭha tlem deuh mah se khawtlang tana an thil tih tumte leh an hmalakna turte chu an tlangaupui hman a; mipui lam pawhin political party lam zawnga la loin mahni khúa leh veng tana ṭangkai thei ber tura an rinte an thlang chhuak ta. 

Inthlan inbuatsaihna lamah hri lêng avangin harsatna a awm ve neuh neuh a, vote chhiar zawh hmaa lockdown hnan vengte pawh a awm nawk a, inthlan zawh hnua Covid-19 thila in chhui zui ngaite pawh a awm bawk. Hetiang huama inthlan hi buatsaih a nih avangin harsatna thleng hrang hrangah hian thuneitu lamin mawh an lâk ngam a ngai ve ang a, inthlan kaihhnawiha hri a lo darh palha sum senso ngaia inenkawl zui ṭul an awm a nih pawhin thuneitu lamin an tumsak tur ni awm tak a ni. 

Tunah chuan veng leh khaw bil enkawl­tu tir mi thar ṭha tak tak thlan fel an ni tawh a, inthlan hmaa  an au hlate hre reng chungin khawtlang rawngbawl hna thawk se, political party tana thlan tlin ni loa khawtlang tana thlan an ni tih hre reng chungin hna thawk zui zel rawh se.