Suma duhamna ngawlvei

Mizoram University Vice Chancellor chuan tun hnai khan zirlaite fuihin, "Dik leh zahawm takin sum in lalut tur a ni a, suma duhâmna hi ruihhlo leh zu anga a ngawl vei theih a ni. Sum hi chu nunah a pawimawh a, mahse, dik leh zahawm taka lakluh tur a ni. Ngawlveite chuan an ngawlveina piah lam bak an ngaihven tawh loh avangin fimkhur ang che u," a ti a; St. Joseph Higher Secondary School, Aizawlin an hlawhtlinna an lawmnaah a sawi.

Mizorama zirna in sang bera an hotu berin zirlaite a fuihna ṭawngkam hi Mizoramah hian kan sawi uar a ṭul hle mai a, suma duhamna ngawl vei hi thil hlauhawm tak a ni. Vice Chancellor sawi ang hian miin a ngawl a vei tawh chuan a ngawlvei ber chu a atchilh tawh a, thil dang a ngaihven thei tawh lo a, hei vang hian suma duhamna ngawlvei hi a hlauhawm reng a ni.

Thil vanduaithlak tak mai chu kan ram hruaitu zingah mi ṭhenkhat sum chelek nasa leh sum chungchang sawi uar bik, an thil sawi apianga suma thil teh chi kan nei hi a ni. Miin thil tehna atana sum a hman tawh chuan a hlauhawm hle tawh tihna a ni a, sum hmuh theihna tura tih hreh nei lo ram hruaitu kan nei ang tih a hlauhawm hle.

Mizorama kan buaina chu eizawnna atana politics hmang kan nei hi a ni a, hnathawh leh sum lakluhna dang an neih hriat si loh, politics-a an awm tak avanga hausa kan neihte hian ram an tichhe mek. Suma duhamna ngawlvei kan tih zingah hian politician eng emaw zat an awm ngei ang a, heng mite hian ram an tihchhiat avangin suma rinawm lo chu eng political party mi pawh ni se, mipuite hian vote hmanga kan paih a hun tawh takzet a ni.