Leivung paih duhdah kan tuar

Tuivawl lui tui thlitfîm theih loh khawpa a nut nasat avangin Saitual khawpuiah thla khat vel tui sem mumal a ni tawh lo a, Saitual Water Supply Scheme-ah tui an pump thei lo. National highway laih zauh a nih avangin luiah leivung paih a ni a, hei hi mipuiin an tuar mêk a ni.

Mi ṭhahnemngaiten leivung paih chungchangah rawtna an siam ṭhin a, a ṭhenin a hmuna kalchilhin an sawisel a, chuti chung chuan hlauh nei lo ang maiin leivung hi an paih lui zel a, a nghawng kan tuar ta a ni.

Kan ramah ngei state pawn lam miin hna an rawn thawk a, dan loin an duhna hmunah leivung an paih a, a khap theitu lamin an khap pawhin awmzia a nei lo a, thuneitu lamin an ngaimawh lo emaw tih mai turin an en liam a, a pawi takzet a ni.

Mahni ram pawh humhalh lo leh, mahni ram leilung lo pawh enkawl nachang hre lo ang lek lekin kan lang ta hi thil zahthlak tak a ni. Mi ṭhahnemngaiten theihtawp chhuahin leivung paih tur an duh loh thu an au chhuahpui a, a sorkar lam aṭangin thlawpna an nei ṭha tawk lo nge ni ang, kan rama lui tam tak chu in tlak lohin a nu zo a, hei hi a mawhphurtu an awm a nih ngai chuan contractor leh anmahni khap hneh lotu sorkar an ni ngei ang le.