Sorkar zirtirtu leh an post

School Education Minister chuan, tun hnaia zirtirtu lâk tharah a theih ang angin a khaw mite lâk an nih thu sawiin, chu chuan zirtirtu, thingtlanga awm ṭhat duh loh vanga harsatna a tihziaawm theih beisei a nih thu a sawi.

Mizorama kan buaina lian tak pakhat chu sorkar sikula zirtirtu awm ṭha duh lo hi a ni a, zirtirtu tam tak chu thingtlanga post an ni chungin khawpuiah an awm lui a, aikal lain an awmna hmun turah an awm duh lo. Hetiang hi kan dinhmun a nih avangin kan zirna a ṭha tawk lo leh, kan zirlaiten mi dang an phak lo deuh nia lang pawh hi thil mak a ni lo a, kan sorkar sikulah zirlai an tlem tawlh tawlh pawh hi a mak lem lo.

Kan ramah hian thil ṭul tam tak awm zingah zirna siam ṭhat hi a pawimawh ber pakhat a tling a, tuna kan kal danah hi chuan a zirtirtu ber pawh an awmna tur dikah sorkarin a la dah hleithei lo hi a manganthlak hle a ni. Sorkar hnathawk ni si, sorkar aṭanga hlawh la ni bawk an awmna tura sorkarin a dahna hmuna kal duh lo an awm leh, chu'ng mite chu sorkarin a thunun thei tlat lo hi chu thil mak tak a ni.

Engpawhnise, sorkarin ruahmanna ṭha tak siama sorkar sikul zirtirtu an lâk tharah a theih chin chinah a khaw mi a la zel hi thil lawmawm tak a ni a, chutih laiin a thiam leh tling ber ber lâk erawh thil pawimawh hmasa ber a ni awm e.