MPF inkaihhruaina leh politician

Mizoram People Forum (MPF) chuan tun hnaiah Hachhek biala MLA candidate tura puan tawhin, ran eng emaw zat talha mipui sang chuang tana ruai a buatsaih chu MPF leh political party-te Thawhhona Thuthlung bawhchhiatna a nih thu an tarlang a; rinawm taka Thawhhona Thuthlung zawm turin political party tin an ngen.

MPF chuan, "Inthlan campaign nana ruaiṭheh, sum, therhlo leh a thlâwna thil tihsak intiam hi MPF leh political party-te Thawhhhona Thuthlung bawhchhiatna a ni. MPF chuan he thil thleng hi a la thutak hle a, hetiang thil hi khawi hmunah mah thleng tawh lo se kan ti a, MPF chuan party hrang hrangte chêt dan hi thlirin a vil zui zel dawn a ni," an ti.

MPF hi awm lo ta se kan ram politics kalpui dan tur chu kan ngaihtuah thiam vek awm e, tunah MPF an awm chung leh inthlan a la hla deuh chung pawha hetianga ualau taka MPF thuthlung bawhchhe ngam kan awm a nih chuan, kan hmabak hi a ko hle a tih theih ang. Chutih laiin MPF inkaihhruaina hi a ṭhain kan zah tlâng hle tih a lan chianna chu, a bawhchhe lo a tam zawk an ni a, kum 2023 MLA inthlan tur thila tun thlenga MPF thuthlung ualau taka bawhchhia MPF-in an khak chu hmun khatah chiah a la thleng.

MPF leh political party-te Thawhhona Thuthlung hi party tinin hming an ziah hnan a ni a, a lehlamah kohhran leh tlawmngai pawl aiawhin an ziak bawk. Chuti chunga kan party ṭhatna tura kan bawhchhe lui zel dawn a nih chuan thuthlung awmze nei loah a chang palh ang tih a hlauhawm a, MPF em pawh zah zo loa vote kan zawng ṭan nghal a nih chuan kan inenfiah a ngai a, political party tinin MPF nena kan thawhhona hi i zah tlâng ang u.