Mizoram leh Manipur CM inkawm thu

Manipur-a buaina chhuak chungchangah Manipur Chief Minister Biren Singh chuan Mizoram Chief Minister Zoramthanga a rawn bia a; boruak ṭha zawk siam turin Mizoram sawrkar hotute leh sawrkar laipuite nen hma lakho ṭul tiin, Mizoram Chief Minister chu a rawn sawm a, ani pawhin ṭha a tihpui thu a hrilh.

Manipur tualchhung buaina hian nghawng a nei lian hle mai a, nunna tam tak chân a nih bakah mi tam takin an in leh lo an chân a, eizawnna tihchhiat niin chenna in nei lo mi tam tak an awm bawk. He buaina hi a chhuah chhan chhui chhuah a pawimawh rualin, tunah chuan remna siam hi thil pawimawh hmasa a ni tawh awm e.

Hnam leh hnam, chi leh chi inkara buaina chhuak a nih avang hian a reh mai lo ang tih a hlauhawm hle a, tun aia chhiatna nasa zawk pawh thleng thei a ni. Union Home Minister meuhin a tlawh tawh hnuah pawh buaina a la punlun zel a, a chhan lian tak nia lang chu Manipur sorkarin a tih tur a ti duh lo emaw, a tih loh tur a tih luih tlat vang emaw niin a puh theih ang.

Hetih laia Manipur CM-in Mizoram CM zawk remna siampuia a rawn sawm teh hlauh hi thil mak tak a ni a, mahni tualchhung buaina chu chinfel theih awm tak a nih lai a, state ṭhenawm lam a rawn dàwr daih mai hi a mak angreng hle. Hetiang a nih tawh chuan Manipur-a Zofate tawrhna a tawp theihna turin kan CM pawhin theihtawp chhuah se, NDA leh NEDA lama an thawhpui BJP CM hi Mizoram CM hian a hmin theih ngei i beisei ang.