Lui tui nut chhanah sorkar a mualpho

Mizorama lui ṭhenkhat chu mipui ei/in atana tihfim theih loh khawpin a nu a, Centre for Environment and Social Justice (CESJ) chuan, Tlawng lui tui nut chhan leh tibawlhhlawhtute chhui chhuah a, dan anga hmalak a nih theih nan Aizawl district Chief Judicial Magistrate (CJM) hnenah chhui phalna an dil dâwn.

Khawpui ṭhenkhatah lui tui a nut avangin thlit fîm theih a ni lo a, hei vang hian PHE department chuan tui an pump thei lo tih thu an chhuah. Saitual, Champhai leh Aizawl bakah khawpui dangah an tui lakna a nut avangin ei/in tlak a ni lo a, tui fîm leh nut tehna Nephelometric Turbidity Unit-ah pawh tihfìm theih chin aia a lêt tam takin a nu hlawm a, a pawi hle a ni.

Heng thil a thlen chhan lian ber chu kan rama kawngpui laihna leivung duhdah taka an paih vang a ni. Sorkar lamin heng leivung paihte hi an vil tur a nih laiin a hunah an vil lo a, mipui ṭhahnemngai an au chhuah hnuah leivung paih an vil leh hnuhnawh a, pawi an lo khawih nasa hman hle a ni. Tui a nut piah lamah luia nungcha tam takin an thih phah a, luiin a kuang a sawn avangin chhungkaw tam tak buh leh thlaiin a tuar a, huan tam takin a chhiat phah bawk.

Heti taka kan lui tui a nu ta leh kawngpui kama ramte suasam a ni hi sorkar chak loh vanga puh loh chu thil harsa tak a ni a, a tisualtu hrem tih réng awm si loin mipuiin an tuar tlawk tlawk a, kan ram lui tui venghim theitu leh venghim tura a taka pen chhuak ngam sorkar kan mamawh a, Mizoram sorkar a ṭan a ngai hle a ni.